“Si nou renmen moun ki renmen nou, sa sa ap rapòte nou? Ata moun k-ap viv nan peche yo, yo renmen moun ki renmen yo” (Lk 6, 32).

Ekri nan fevriye 1992

            Pawòl lavi mwa sa soti nan levanjil Lik. Se yon moso nan pami anpil pawòl Jezi, sa yo rele koze sou mòn nan, nan levanjil Matye. Jan nou konnen, nan pati sa, Jezi montre egzijans Reny Bondye a epi sa ki fè moun yo rekonnen kilès ki ladan-l. Karakteristik sa yo soti nan Papa ki nan syèl la epi yo mennen moun yo sanble avè-l.

            Nan ti moso sa, Jezi envite patizan li yo pou yo imite renmen Bondye Papa-a. Si nou vle pou-n pitit li, nou dwe renmen pwochen nou an menm jan li menm li renmen-l.

“Si nou renmen moun ki renmen nou, sa sa ap rapòte nou? Ata moun k-ap viv nan peche yo, yo renmen moun ki renmen yo.”

            Premye ak pi gwo karakteristik renmen Bondye Papa-a, se dèske li gratis nèt ale. Li diferan anpil ak renmen lèzòm. Alòske renmen lèzòm chita sou sa yo ka jwenn anretou oubyen sou santiman (n-ap renmen moun ki renmen nou yo ak moun nou renmen yo), renmen Bondye Papa-a li menm, li dezenterese nèt ale, li bay moun li te kreye yo pwòp tèt li, san li pa gade repons ki ka vini answit. Se yon renmen ki konn pran devan nan bay tout sa li genyen.

            Sa vle di se yon renmen k-ap konstwi epi k-ap transfòmen. Papa ki nan syèl la pa renmen nou paske nou bon, paske lespri nou bèl epi sa merite atanzyon ak bonkè li. Okontrè, nan renmen li renmen nou, li kreye bonkè nan nou menm ak bèlte lespri pa lentèmedyè favè li-a, dekwa pou-l fè-n tounen zanmi li epi pitit li yo.

“Si nou renmen moun ki renmen nou, sa sa ap rapòte nou? Ata moun k-ap viv nan peche yo, yo renmen moun ki renmen yo.”

            Yon lòt karakteristik renmen Bondye Papa-a sèke li pou tout moun. Bondye renmen tout moun san li pa fè diferans. Mezi renmen sa, sèke li pa gen okenn limit ni okenn mezi.

            Paske renmen li-a pa ta kapab gratis epi kreyatif, si li pa-t ka rive tout kote ki gen bezwen oubyen si la te kite yon vid san li pa-t plen li.

            Se poutèt sa Bondye ki nan syèl la renmen menm pitit li yo ki pa gen rekonesans, ki lwen oubyen ki revòlte.

“Si nou renmen moun ki renmen nou, sa sa ap rapòte nou? Ata moun k-a viv nan peche yo, yo renmen moun ki renmen yo.”

            Kijan pou-n viv Pawòl Lavi mwa sa?

            Nan fason n-ap viv tankou pitit Bondye ki nan syèl la tout bon vre. Sa vle di nan imite renmen li-a ki gratis epi ki pou tout moun jan nou sot wè. N-ap chèche renmen an premye, ak yon renmen tankou yon moun ki gen bonkè, ki solidè, ki louvri kè-l byen gran pou tout moun, yon fason ki espesyal pou tout kalite bezwen nou ka jwenn bò kote nou-an. N-ap chèche renmen san nou pap tann anyen anretou. N-ap chèche tounen zouti renmen Bondye ki pa gen limit nan fason n-ap fè lòt yo patisipe nan kado nou te resevwa nan men Bondye kit se nan sa nou ye-a kit se nan sa nou te resevwa nan men li.

            Si n-ap kite Pawòl Jezi-a tounen yon gid pou nou, n-ap gen je ki nouvo ak yon kè ki nouvo pour tout moun k-ap pase bò kote nou nan tout ti okasyon lavi chak jou-a. Nenpòt kote n-ap ye (fanmi, lekòl, travay, lopital, elatriye), n-ap santi yon fòs k-ap pouse nou tounen moun k-ap bay renmen Bondye sa-a Jezi te vin pote sou tè-a, sèl kalite renmen ki kapab chanje fas tè-a.

Kyara Libik

“Tout lalwa-a se nan yon sèl mo li jwenn bout li, nan sa ki di: Se pou-w renmen pwochen-w tankou ou menm nan” (Ga 5,14).

Yo te ekri-l nan lane , 1983/10

Sa se yon pawòl Àpòt Pòl: li kout, li bèl anpil, li fò, li mete tout bagay yo aklè.

Li di nou sou kisa konpòtman kretyen yo dwe chita, sa ki souf li: renman pwochen an.

Apòt la wè si yon moun ap viv kòmandman sa, l-ap viv lalwa nèt ale. Sèke lalwa di nou pa fè adiltè, pa touye moun, pa vòlè, pa anvi… epi moun ki renmen pa fè tout kalite bagay sa yo: moun ki renmen pa touye, pa vòlè...

“Tout lalwa-a se nan yon sèl mo li jwenn bout li, nan sa ki di: Se pou-w renmen pwochen-w tankou ou menm nan”

            Moun ki renmen se pa sèlman fè li pa fè sa-k mal la. Moun ki renmen louvri kè-l pou lòt yo, li vle sa-k bon pou yo epi l-ap fè-l, li bay pwòp tèt li: li rive bay lavi pou moun li renmen an.

            Se poutèt sa Pòl ekri renmen pwochen an se pa sèlman kenbe lalwa, men se mete-l “nan bout li”.

“Tout lalwa-a se nan yon sèl mo li jwenn bout li, nan sa ki di: Se pou-w renmen pwochen-w tankou ou menm nan”

            Si tout lalwa-a chita sou renmen pwochen an, nou bezwen wè nan lòt kòmnadman yo yon mwayen pou klere nou epi mennen nou, dekwa pou-n kapab jwenn nan tout sikonstans lavi nou-an chemen pou-n renmen lòt yo: nou bezwen konn li lòt kòmandman yo ki se lide Bondye, sa li vle pou-n fè.

            Si li vle pou nou obeyisan, pou-n kenbe kè nou pwòp, pou-n bliye tèt nou, pou nou dou, pou-n gen bon kè, pou nou pòv... se pou nou kapab reyalize kòmandman renmen an.

“Tout lalwa-a se nan yon sèl mo li jwenn bout li, nan sa ki di: Se pou-w renmen pwochen-w tankou ou menm nan”

            Petèt nou kapab poze tèt nou kesyon sa: pou kisa Apòt la pa pale sou renmen Bondye?

Sèke renmen Bondye epi renmen pwochen an yo pa an konpetisyon. Premye-a, renmen pwochen an, montre lòt la, renmen Bondye. Sèke renmen Bondye vle di fè sa li vle pou-n fè. Epi sa li vle pou-n fè se renmen pwochen an.

“Tout lalwa-a se nan yon sèl mo li jwenn bout li, nan sa ki di: Se pou-w renmen pwochen-w tankou ou menm nan”

            Kijan pou-n mete an pratik pawòl sa?

            Repons la klè: nan renmen pwochen an, renmen-l tout bon vre.

            Sa vle di: bay, men bay san nou pa chèche enterè pa nou.

            Sila ki sèvi ak pwochen an tankou yon enstriman pou li menm menm, menm si se te pou-l vin sen, li pa nan renmen. Se pwochen an pou-n renmen, pa pwòp tèt nou.

            Se sèten moun ki renmen gratis konsa l-ap vin “sen tankou Papa-a” (paske li te fè sa ki te pi bon: li te chèche fè sa Bondye vle pou-l fè, li te mete-l an pratik. Li te akonpli lalwa nèt ale.

            Eske egzamen n-ap pase nan finisman lavi a pap sèlman sou renmen sa?

Kyara Libik

« Si poutèt byen nou fè n-ap sipòte tray, sa-a se yon favè devan Bondye » (1 Pyè 2,20).

Apòt Pyè montre kominote li yo vre lespri levanjil la nan fason y-ap viv li, nan kondisyon lavi chak moun, kote li ye-a.

Li pale avèk esklav yo ki te fè-k konvèti. Tankou tout esklav yo nan sosyete tan sa, yo te konn pase tray ak tout kalite movè tretman. Pawòl sa yo kapab bon tou pou tout moun k-ap pase tray anba enjistis moun ki bò kote yo, kit yo pi wo kit yo egalego, nan tout tan yo ak tout kote yo.

« Si poutèt byen nou fè n-ap sipòte tray, sa-a se yon favè devan Bondye. »

Apòt la di moun sa yo pou yo pa swiv premye reyaksyon pa yo nan sitiyasyon konsa, men pou yo imite konpòtman Jézi-a. Sa vle di li enkouraje yo reponn ak renmen, paske, nan difikilte ak nan sitiyasyon sa yo, yo kapab dekouvri yon kado, sa vle di yon okasyon Bondye pèmèt pou yo bay prèv se vre kretyen yo ye. Konsa, anplis, ak renmen sa, y-ap rive pote kot Kris la moun sa yo menm ki pa konprann yo.

« Si poutèt byen nou fè n-ap sipòte tray, sa-a se yon favè devan Bondye. »

Avèk pawòl sa yo oubyen ak lòt ki sanble yo, gen moun ki akize kretyen yo dèske yo soumèt tèt yo two fasil, sa ki fè yo kite konesans pa yo dòmi epi yo sispann goumen ak enjistis yo.

Se pa konsa bagay yo ye. Si Jezi mande-n pou nou renmen, menm moun ki pa konprann nou epi k-ap maltrete nou, se pa paske li vle pou nou pa sansib devan enjistis yo, okontrè! Li vle montre nou kijan pou-n bati yon sosyete ki jis tout bon vre. Se sa nou kapab fè, nan gaye lespri vre renmen-an, nan fason n-ap kòmanse renmen an premye.

« Si poutèt byen nou fè n-ap sipòte tray, sa-a se yon favè devan Bondye. »

Kijan pou-n viv Pawòl lavi mwa sa?

Gen anpil okasyon, kote nou menm menm, nou santi moun yo pa konprann nou epi yo maltrete nou. Sa kapab rive depi yo manke-n dega epi yo gwosye avèk nou, jous yo rive jije nou mal, yo san rekonesans, yo imilye nou, yo enjis avèk nou.

Enben, nan tout okasyon sa yo, nou bezwen montre renmen Jezi te pote sou latè li pou tout moun, kidonk pou moun ki maltrete nou tou.

Nan défann n-ap défann jistis la ak verite a, Pawòl mwa sa vle fè-n sonje premye devwa pa nou tankou kretyen se renmen lòt, kenbe bon jan relasyon avè-l ki va montre nou konprann li, nou akeyi li, nou gen pitye pou li, menm jan Jezi te fè pou nou menm tou. Konsa menm nan defann n-ap defann lide nou yo, nou pap janm kraze relasyon nou an, nou pap janm tonbe nan tantasyon rankin oubyen remèt kou pou kou.

Si n-ap fè konsa, tankou enstriman renmen Jezi-a, n-ap kapab nou menm tou pote pwochen nou-an bay Bondye.

Kyara Libik

“Bay, y-ap ba nou. Se yon bon mezi byen foule, byen souke, k-ap debòde, k-ap vide nan pwatrin nou” (Lk 6, 38).

            Èske-w pat janm resevwa yon kado nan men yon zanmi epi w te santi-w te bezwen fè kichòy pou li? Fè-l pa si tèlman paske-w dwe li kichòy, men paske-w renmen li? Wi sèten.

            Si sa te rive pou-w, ou ka imajine pou Bondye, li menm ki se Renmen.

            L-ap remèt nou tout kado nou kapab fè pwochen nou yo sou non li. Se yon eksperyans vre kretyen yo konn fè anpil fwa. Chak fwa, yo sezi. Nou pa janm abitye dekouvri kijan Bondye konn envante. Mwen ta kapab bay mil, dimil egzanp, mwen ta ka ekri yon liv sou sa. Ou ta kapab wè kijan imaj sa vre «yon bon mezi byen foule, byen souke, k-ap debòde, k-ap vide nan pwatrin nou”. Sa vle di kijan Bondye konn remèt, avèk tout renmen ki nan kè-l.

            Men yon egzanp. “Lanwit te gen tan tonbe sou Wòm. Ti gwoup jènn fi yo, ki te vle viv levanjil la, te nan kay epi youn t-ap swete lòt bòn nwuit. Men klòch la ki sonnen nan pòtay la. Kilès sa kapab ye nan lè sa? Yon mesye prezante tèt li nan pòtay la, kè-l sote, li dekouraje: nan demen yo va mete-l deyò lakay ansanm ak tout fanmiy li paske li pa-t peye lwaye li-a. Fi yo gade epi, paske yo wè yo dakò, yo louvri ti bwat kote yo konn mete nan diferan anvlòp yo, ti kras ki rete nan lajan travay pa yo epi lajan pou peye gaz la, telefòn nan, limyè-a. Yo bay moun nan tout sa-k te anndan-l, san yo pa rezonen. Yo dòmi ak kè kontan nan nwit sa. Yon lòt ta pran ka yo. Men anvan menm bajoukase, telofòn nan sonnen. ‘ M-ap vini touswit nan taksi’, di vwa mesye-a. Fi yo, sezi wè ki mweyen li t-ap pran, te rete ap tann li. Figi moun nan di yo gen kichòy ki chanje: ‘ Ayè nan aswè, apenn mwen tounen lakay, mwen jwenn yon eritaj mwen pa ta janm kapab imajine resevwa. Kè-m te di-m pou-m separe mwatye avèk nou’. Sòm nan te egzakteman de fwa sa yo te bay ak anpil renmen”.

“Bay, y-ap ba nou. Se yon bon mezi byen foule, byen souke, k-ap debòde, k-ap vide nan pwatrin nou”.

            Èske-w te fè eksperyans sa w menn tou? Si-w pa-t fè-l, se pou-w sonje ou dwe bay yon fason ki dezenterese, san ou pa chèche jwenn kichòy anretou nan men sila ki mande-a.

            Eseye. Men pa pou wè rezilta, men paske-w renmen Bondye.

            Petèt w-ap di-m: “Men mwen pa gen anyen».

            Se pa vre. Si nou vle, nou genyen trezò ki pap janm fini: tan lib pa nou, kè nou, souri nou, konsey pa nou, kilti pa nou, kè poze pa nou, pawòl pa nou, pou-n di moun ki genyen yo, bay moun ki pa genyen…

            Oubyen: “Mwen pa konnen ki moun pou-m bay”.

            Se pou-w gade tout kote: ou sonje moun sa ki malad lopital, vèv sa ki toujou pou kont li, konpanyon pa-w, yo te revoke yon fason ki avilisan, jènn chomè ki toujou tris, ti frè-w ki bezwen sipò, zanmi-w ki nan prizon, apranti ki ezite? Se nan yo Kris la ap tann ou.

            Se pou-w pran nouvo konpòtman kretyen an, ki parèt nan levanjil la, li pa vle pou-w fèmen kè-w, pou-w chaje tèt ou. Se pou-w refize mete sekirite pa-w nan byen latè epi pou-w kore sou Bondye. Se lè sa yo va wè lafwa-w genyen nan li epi lafwa sa va grandi poutèt kado k-ap retounen ba-w.

            Li klè Bondye pa fè konsa pou-l fè nou vin rich, oubyen pou nou menm menm n-ap fè pwòp tèt nou vin rich. Li fè konsa pou lòt yo, anpil lot yo, etan y-ap wè ti mirak sa yo k-ap vini ansanm avèk kado n-ap ba yo, yo kapab fè menm jan.

            Li fè-l paske pi plis nou genyen, pi plis nou kapab bay; paske, tankou vre administratè byen Bondye yo, nou kapab fè tout bagay sikile nan kominote ki alantou nou, jous yo kapab di tankou pou premye kominote Jerizalèm nan: pèsòn pami yo pa-t nan bezwen (At 3,34).

            Èske-w pa santi sa kapab bay revolisyon sosyete-a ap tann nan, yon souf ki sèten?

            “Bay, y-ap ba nou”. Sèten Jezi t-ap sonje rekonpans nou pral resevwa nan syèl la, men sa nou resevwa isit la se yon avalwa sou sa k-ap vini-an.

Kyara Libik

“Pa plenyen youn kont lòt, frè-m yo” (Jc 5,9).

            Pou-n kapab konprann pi byen Pawòl lavi-a yo prezante nou nan mwa sa, nou bezwen konnen pou kisa yo te ekri li. Se difikilte yo te genyen nan kominote kretyen yo ki te fè apòt Jak ekri lèt sa. Te genyen eskandal yo, diskriminasyon yo t-ap fè ant moun yo, fason egoyis yo t-ap sèvi ak richès pa yo, esplwatasyon travayè yo, lafwa nan pawòl pase nan aksyon yo, elatriye. Tout bagay sa yo t-ap fè moun yo te gen degoutans ak mekontantman youn ak lòt, sa ki t-ap fè kominote-a pat alèz.

“Pa plenyen youn kont lòt, frè-m yo.”

            Kidonk, nan tan apòt yo deja, moun yo te kapab wè sa nou konn wè nan kominote nou yo jodi-a. Pi gwo difikilte pou-n viv lafwa nou anpil fwa pa soti andeyò, sa vle di nan monn nan, men yo soti anndan-an. Yo soti nan kalite sityasyon nou kapab wè epi nan konpòtman frè nou yo, ki pa nan liy levanjil la. Se sa k fè moun yo pa alèz, yo manke konfyans epi yo gen pèrèz.

“Pa plenyen youn kont lòt, frè-m yo.”

            Men tout kalite kontradiksyon ak èrè sa yo ki plis ou mwens grav genyen rasin pa yo nan yon lafwa ki manke limyè epi nan yon renmen ki poko tout bon vre pou Bondye ak pou pwochen-an. Premye reyaksyon kretyen an pa dwe nan enpasyans ni nan kè di ak moun, men li dwe sanble ak sa Jezi te montre nou. Li mande pou-n kapab tann ak pasyans, konprann epi genyen yon kè ki sansib k-ap ede ti grenn byen an li te simen nan nou tout grandi tankou li di nan parabòl zizani-a (Mt 13, 24-30.36-43).

“Pa plenyen youn kont lòt, frè-m yo.”

            Kijan pou-n viv Pawòl lavi nan mwa sa? L-ap mete nou devan yon difikilte lavi kretyen yo. Nou menm tou, se nan divès kominote nou ye ( fanmi-a, pawas la, asosyasyon-an, travay la, kominote lavil la) kote kapab genyen yon pakèt bagay ki pa mache byen dapre nou menm menm: tanperaman yo, fason pou moun wè, fason pou yo fè, bagay ki manke ajiste k-ap fè nou soufri epi k-ap fè nou reyaji mal.

            Men anpil okasyon pou-n byen viv Pawòl lavi mwa sa-a. Olje n-ap di mal oubyen n-ap kondane - jan nou ta vle fè - an nou mete tolerans epi konpreyansyon. Toutotan nou kapab, an nou kòrije frè-n yo nan renmen. Sitou an nou tounen temwen levanjil la nan fason n-ap bay tout mank renmen oubyen angajman, yon renmen oubyen yon angajman ki pi fò ankò k-ap soti nan men nou.

Kyara Libik 

“Moun ki san peche nan pami nou-an, se pou-l voye wòch an premye sou li” (Jn 8,7).

            Pandan Jezi t-ap bay lansèyman nan kay sakre-a, pwofesè yo ak farizyen yo mennen yon madanm marye yo te kenbe ap fè movè dezòd epi yo te di-l : “Nan lalwa-a, Moyiz kòmande nou pou kalité moun sa yo, yo touye yo ak kout wòch. Ou menm sa-w di?” (Jn 8,5).

            Konsa yo te vle pran li nan pyèj. Sèke si Jezi pa-t dakò pou yo touye-l, yo te kapab di li ale kont Lalwa, paske dapre sila, temyen dirèk fòt la te dwe voye wòch an premye sou sila ki te peche-a epi pèp la kontinye voye tou. Si Jezi te di li dwe mouri, yo t-ap mete-l an kontradiksyon avèk lansèyman li sou kè sansib Bondye pou pechè yo.

            Men Jezi t-ap ekri ak dwèt li sou tè-a san li pa-t pran ka yo epi li drese kò-l, li di yo:

“Moun ki san peche nan pami nou-an, se pou-l voye wòch an premye sou li.”

            Moun ki t-ap akize madanm nan pati youn pa youn, kòmanse pa sa-k pi granmoun yo. Mèt la di madanm nan: “Kote yo? Pèsòn pa kondane-w?”

            Li di : “Pèsòn, Granmèt.” “ Ni mwen menm tou, mwen pa kondane-w. Ale, apati koulye-a, pa fè peche ankò.” (cf. Jn 8, 10-11).

“Moun ki san peche nan pami nou-an, se pou-l voye wòch an premye sou li”

            Ak pawòl sa yo, Jezi pa vle montre li dakò ak sa-k mal, tankou adiltè. Pawòl li yo: “Ale, apati koulye-a, pa fè peche ankò” montre aklè sa ki kòmandman Bondye.

            Jezi vle mete aklè tou kijan, moun k-ap jije sè li-a tankou yon moun k-ap fè peche, li ipokrit epi li pa rekonèt li menm tou, se pechè li ye. Li souliyen, ak pawòl sa yo, pawòl sa moun yo konnen byen: “Pa jije, pou yo pa jije nou, paske ak jijman n-ap jije-a y-ap mezire pou nou” (Mt 7,1-2).

            Nan pale konsa, Jezi pale tou ak moun ki kondane lòt yo nèt ale, san yo pa konsidere yo kapab regrèt sa yo te fè-a. Li montre aklè kisa ki konpòtman pa-l devan moun k-ap bite : mizèrikòd. Lè moun ki te kondane madanm nan yo gen tan ale, “yo te rete toulede - di Ogistin, Monsèyè Ipòn nan - : mizè-a ak mizèrikòd la”.

“Moun ki san peche nan pami nou-an, se pou-l voye wòch an premye sou li.”

            Kijan pou-n mete an pratik Pawòl sa?

            Nan sonje devan nenpòt nan frè ak sè nou an se pechè nou ye. Nou tout nou gen tan fè peche epi, menm si sanble nou pa-t fè gwo èrè, nou dwe toujou sonje sikonstans lavi ki te kapab fè lòt yo bite epi ale lwen Bondye. Kijan nou ta fè nan plas yo?

            Nou menm tou, gen de fwa nou te kraze fil renmen ki dwe mare nou ak Bondye, nou menm tou nou pa-t fidèl.

            Si Jezi, sèl moun ki te san peche, pa-t voye premye wòch kont adiltè-a, nou menm menm nou pa ka fè-l kont pyès moun.

            Kidonk, an nou genyen mizèrikòd pou tout moun, an nou reyaji kont sa ki kapab pouse nou kondane san pitye, nou dwe konn padonnen epi bliye. Pa kite nan kè nou ti kal jijman ak rankin kote kòlè-a ak rayisans lan ka fè nich pou yo ekate nou ak frè-n yo. Gade chak moun tankou si li te nouvo.

            Nan plas jijman ak kondanasyon si nou genyen renmen ak mizèrikòd pou chak moun, n-ap ede-l kòmanse yon lavi ki nouvo, n-ap ba li kouraj pou-l rekòmanse chak fwa.

Kyara Libik

“Nou menm nou konnen nou travèse sot nan lanmò-a al nan lavi-a, paske nou renmen frè nou” (1Jn 3,14).

            Jan ekri kominote chretyen li te fonde-yo nan yon moman ki difisil. Sèke erè ak lide ki pa-t kòrèk sou lafwa ak fason pou moun yo viv te kòmanse kouri epi kretyen yo te oblije viv nan mitan yon mantalite payen ki te di epi ki pa-t dapre lespri levanjil la.

            Paske li vle ede pitit li yo, apòt la montre yo yon remèd efikas: renmen frè yo, viv kòmandaman renmen an yo te resevwa depi nan kòmansman e ki ranmase tout lòt kòmandman yo.

            Si y-ap fè konsa, y-ap konnen kisa “lavi-a” ye, y-ap rantre nan tèt ansanm ak Bondye, y-ap fè esperyans Bondye se Renmen. Konsa y-ap vin pi djanm nan lafwa yo epi y-ap kapab fè fas kare ak tout atak yo nan tan kriz la.

“Nou menm nou konnen nou travèse sot nan lanmò-a al nan lavi-a, paske nou renmen frè nou.”

            “Nou menm nou konnen...”. Apòt la pale sou yon kalite konesans ki soti nan esperyans lan. Se tankou si li t-ap di: nou te eseye-l, nou te manye-l. Se esperyans sa, kretyen, li te anonse levanjil ba yo, te fè depi nan kòmansman. Sa vle di lè yo mete an pratik kòmandman Bondye yo, sitou kòmandman renmen frè yo, lè sa yo rantre nan lavi Bondye-a menm.

            Men kretyen k-ap viv jodi a, eske yo konnen esperyans sa? Yo konnen yo bezwen mete kòmandman Granmèt la an pratik. Jezi di anpil fwa se pa kont pou moun yo tande-l, men yo bezwen mete Pawòl Bondye an pratik (cf. Mt, 5,19-7,21).

            Men pi fò nan kretyen yo pa considere sa ki pi bèl nan lavi kretyen yo, kit se paske yo pa konnen kit se paske yo konnen nan tèt sèlman san yo pa fè esperyans sa apòt Jan t-ap pale-a. Sa vle di lè n-ap viv kòmandman renmen an, Bondye vin rete nan nou menm epi l-ap fè nou goute yon lavi ki plen, nan kè poze ak nan kè kontan depi isit la sou tè-a.

            Lè sa, tout bagay yo vin klè, tout bagay vin bèl. Pa gen distans ant lafwa ak lavi. Lafwa vin tounen fòs sa k-ap mare ansanm tout aksyon nou yo.

“Nou menm nou konnen nou travèse sot nan lanmò-a al nan lavi-a, paske nou renmen frè nou.”

            Pawòl Lavi sa di nou renmen pwochen an se chemen wa k-ap mennen nou kot Bondye. Depi nou tout se pitit li nou ye, sa li vle pi plis se pou-n youn renmen lòt. Nou pa kapab ba li plis kè kontan pase nan youn renmen lòt.

            Renmen frè ak sè nou yo ban nou tèt ansanm ak Bondye. Li tounen sous limyè ak lavi k-ap bay anpil fwi nan lespri nou-an epi k-ap fè-l vin toujou nouvo. L-ap anpeche gangrenn, maleng epi toujou rete sou plas. Sa vle di “li fè-n travèse sot nan lamò-a al nan lavi-a”. Lè pa gen renmen, tout bagay vin fennen epi li mouri: pa gen kè kontan, bon jan lide, tout bagay vin annwiyan, moun yo chèche chape kò, yo pèdi valè pa yo, elatriye.

“Nou menm nou konnen nou travèse sot nan lanmò-a al nan lavi-a, paske nou renmen frè nou.”

            Frè yo, apòt la ap pale-a, se moun kòminote kote nou ye-a. Si se vre nou dwe renmen tout moun, se vre tou renmen sa dwe kòmanse ak moun k-ap viv ansanm ak nou pou-l rive jwenn tout moun yo. An premye, nou dwe sonje fanmi nou-an, moun n-ap travay ansanm avèk yo, moun ki nan pawas la, nan asosyasyon, nan kònimote kote nou ye-a. Renmen frè-n yo pa ta vre epi li pa ta nòmal si li pa-t kòmanse la. Tout kote nou ye-a, nou bezwen konstwi fanmi pitit Bondye.

“Nou menm nou konnen nou travèse sot nan lanmò-a al nan lavi-a, paske nou renmen frè nou.”

            Pawòl lavi sa louvri pou nou yon pakèt pèspektiv. Li pouse nou nan kokenn chenn avanti renmen ketyen-an k-ap louvri chemen nou pa ta janm prevwa.

            An premye, li fè-n sonje nan mond kote n-ap viv la, ki chita sou vyolans lan, lalwa moun ki pi fò-a, ki gen plis malis, ki pa gen renka, kote pafwa tout bagay vin kanpe rèd poutèt materyalis ak egoyis la, répons pou-n bay se renmen pwochen an. Se sa ki remèd pou geri tout maladi yo. Sèke lè n-ap viv kòmandman renmen an, anplis lavi a vin pi fò, tout bagay alawonnbadè vin santi sa. Se tankou yon chalè ki sot nan Bondye epi ki gaye tout kote nan chanje relasyon ant moun ak moun, ant gwoup ak gwoup jous li rive chanje sosyete a.

            An nou pran desizyon sa. Nou gen yon pakèt frè ak sè pou-n renmen nan non Jezi Kri toujou epi tout kote. Ann fidèl ak kalite renmen sa. Ann ede anpil lòt moun yo fè menm jan. Lè sa n-ap konnen nan nanm nou kisa sa ye pou-n viv nan tèt ansanm ak Bondye. Lafwa nou ap vini pi djanm, dout nou yo ap disparèt epi nou pap toumante tèt nou ankò. Lavi nou va pi plen.

Kyara Libik

“Al aprann sa sa vle di: Se kè sansib mwen vle, plis pase sakrifis” (Mt 9,13. cf. Os 6.6 )

Ekri  1996

“… se kè sansib mwen vle, plis pase sakrifis”.

            Ki lè Jezi te di pawòl sa yo?

            Jezi te atab, li t-ap chita ak kèk kolèktè kontribisyon ak moun ki t-ap viv nan peche.  Lè farisyen ki te la yo wè sa, yo di patizan-l yo: “Pouki sa mèt nou-an ap manje ansanm ak kolèktè kontribisyon ak moun k-ap viv nan péché yo?” (Mt 9,11).  Lè Jezi te tande pawòl sa yo li te di yo:

“Al aprann sa sa vle di: Se kè sansib mwen vle, plis pase sakrifis.”

            Jezi pran yon pawòl pwofèt Oze, konsa li montre kijan li dekò avèk sa l-ap di-a.  Se konsa li menm menm konn aji paske renmen-an pi gran pase tout lòt kòmandman yo.

            Se konsa kretyen yo genyen pou yo viv.  Jezi te vini pou-l di sa Bondye ap tann nan men nou vizavi tout lòt moun yo - kit se gason kit se fiy -: anvan tout bagay se renmen.  Bondye te di deja volonte pa-l nan ekriti yo, jan nou kapab wè nan pawòl pwofèt la (Oze 6,6).  

            Renmen-an se pwogram pou lavi tout kretyen, kòmandman kote tout aksyon li chita, limyè ki ka gide tout demach li yo.

            Renmen-en dwe pase anvan tout lòt kòmandman yo.  Renmen lòt yo se kote tout lòt kòmandman yo chita.

“… se kè sansib mwen vle, plis pase sakrifis.”.

            Jezi vle pou-n renmen epi kè sansib se fason pou-n fè li.

            Li vle pou kretyen an viv konsa paske se konsa Bondye ye li menm menm.

            Pou Jezi, Bondye se kè sansib li ye, se yon Papa ki renmen tout moun, k-ap fè solèy la leve epi lapli tonbe ni sou moun ki kòrèk ni sou moun ki pa kòrèk yo. 

            Jezi, paske li renmen tout moun, li pa pè rete ak pechè yo epi konsa li fè-n wè kilès Bondye ye. 

            Kidonk, si Bondye konsa, si Jezi konsa, ou menm tou w dwe genyen menm santiman.

“… se kè sansib mwen vle, plis pase sakrifis”.

            “...plis pase sakrifis”.

            Si-w pa renmen frè-w, Jezi pa renmen lapriyè-w.  Li pa resevwa lapriyè-w, lamès la, sa-w ka ofri li, si tout bagay sa yo pa soti nan kè poze ak tout moun, ki renmen tout moun.

            Èske-w sonje pawòl fò anpil k-ap soti nan koze sou mòn nan?  “Konsa, si w-ap pòte kado-w sou lotèl la, epi lè w rive la, ou sonje frè-w gen kichòy kont ou, kite kado-w la la devan lotèl la, epi ale, kòmanse rekonsilye ak frè-w la, apre sa w-ap vini, w-ap pote kado-w la” (Mt 5, 23-24.)

            Pawòl sa yo ap di-w kado k-ap fè Bondye plis plezi se renmen pwochen an. Se sou sa kado pou Bondye dwe chita.

            Si-w ta vle fè papa-w yon kado etan ou fache avèk frè-w ( oubyen frè-w avèk ou), kisa papa-w ta di-w?  “Se pou kè-w poze ak frè-w epi apre sa w met ofri-m sa-w vle.”

            Pi plis pase sa.  Renmen an se pa sèlman baz lavi kretyen yo men se chemen ki pi dwat pou-w rete nan tèt ansanm avèk Bondye.  Se sa  moun ki te viv anvan nou kòm temwen levanjil la, sen yo, di nou, se esperyans sa kretyen yo ap fè nan viv lafwa yo: si yo ede frè ak sè yo ki gen plis bezwen, tèt ansanm ak Bondye vin pi gran, yo renmen li plis, yo dekouvri genyen yon bon jan relasyon antre yo menm epi Bondye.  Se sa k ba yo plis kè kontan nan lavi pa yo.  

“… se kè sansib mwen vle, plis pase sakrifis”.         

            Kijan pou-n viv nouvo Pawòl Lavi sa?

            Nou pa dwe fè diferans ant moun nou rankontre yo, nou pa dwe mete pyès moun a kote men bay chak moun sa w kapab bay tankou Bondye Papa-w.  Fè tout dezakò disparèt, kit yo piti kit yo gran, paske Bondye pa renmen yo epi y-ap fè lavi-w pèdi bon gou li-a, pa kite solèy la desann sou kolè-w kont pyès moun, tankou Ekriti-a di: “Pa kite solèy la kouche sou kolè nou” (Ef 4,26).

            Si w-ap fè konsa, tou sa w pral fè-a, ap fè Bondye kontan epi l-ap dire pou tout tan gen tan.  Kit w-ap travay kit w-ap repoze, kit w-ap jwe kit w-ap etidye, kit ou ansanm ak pitit ou yo oubyen w-ap mache ak madanm ou oubyen mari-w, kit w-ap lapriyè oubyen w-ap sakrifye tèt ou oubyen w-ap fè sèvis Bondye ki dakò avèk vokasyon pa-w tankou kretyen, tout bagay ap sèvi pou Reny syèl la.

            Paradi-a se yon kay n-ap bati bò isit la epi kote nou rete lòt bò-a.  Li fèt ak renmen.

Kyara Libik